ABİDƏLƏR TARİXİMİZDİR


64_nCümə məscidi — Məscid Qazax şəhərinin mərkəzi küçəsinin yanında – Şəhidlər Xiyabanı küçəsində yerləşir. Onun qarşısında digər bir tarixi abidə – İsrafil ağa hamamı var. Cümə məscidinin inşasına 1899-ci ildə Kəsəmən Elinin kəndxudası İsrafil ağa Kərbəlayevin təşəbbüsü ilə memar Müzəffər Hüseynovun layihəsi əsasında başlanılıb. Məscidin iki uca minarəsinin üzərində onun Əhli-beyt aşiqi tərəfindən inşa edilməsinə bir imza var ki, Həzrət Əli vilayətinə sadiqliyi əks etdirən şəhadət yazılıb. Məscid həm interyer, həm eksteryer baxımdan zövqlə tikilib, bir növ Kərbəla şəhərində yerləşən İmam Huseynin pak hərəminin məscidinə bənzəyir. Qırmızı bişmiş kərpicdən ucaldılan məscid 17,2 m x 17,2 m ölçülü kvadrat quruluşlu zaldan ibarətdir. Sivri tağlar ilə yaranan səkkizbucaqlı formanın üzərində daxili diametri 13,4 m olan günbəz inşa edilmişdir. Məscidin ümumi hündürlüyü 15 m, divarların qalınlığı isə 1,9 m-dir. Məscidin giriş hissəsini baştağ bəzəyir. Baş fasadın hər iki tərəfindən qoşa minarələr ucalır. Sovet hakimiyyəti dövründə məscid öz fəaliyyətini dayandırmışdır. Ancaq 1990-cı ildən yenidən ibadət yeri kimi fəaliyyətə başlamışdır və hazırda da davam etdirir.